De veurege keer hew al eem kennis met mekare emaakt.

Noe we mekare wat better kent , en de luu veurgesteld bunt die wat met de molle van doen hebt begunnen wie met iene van de vertelsels.

Zo as het vrogger gunk ,giet vandaage de dag niet meer.

Een groot verschil met de mulders van vrogger en noe is de tied diej in de molle deur bracht.

Daij vrogger daagn zaatn te wachtn op wind, met een bult zoad op zolder dat dr deur mos kump noe niet vulle meer veur.

De grootste problemen van noe bunt, oale koffie zonder koeke en koale vuute.

Dat probleem spult allinnig op zoaterdag ,en de rest van de wekke is het dik veur mekare.

Gung er vrogger op een goeijen lange dag twie of drie ton zoad  onder de stien deur , wurt noe thuus trots tegen moeders de vrouwe verteld dat ze wel vief en zeuventig kilo gemalen hebt in drie uur tied.

Wie hef het dan better veur mekare, de mulder van vrogger of de vrijwillig mulder van noe?

Toen was een gezegde bie de mulder en zonen heij grote batsen en lage lonen.

Dat vrogger alles better was geleuve ik niks van ,ging toen die tied de laampe van de mulder met vief en zestig joar met stoflongen uut, noe kump de mulder van vief en zestig joar met de motor noar de molle.

Doarumme nooit tevulle achterumme kieken, dat scheld een stieve nekke en een aanvaaring met een boom.

An de Balk bunne wie op molle bliede met dissen tied, al het mooie kunnen wie juluu loaten zien en de narigheid van toen hew dr niet bie.

Al blif het prachtig um te zien hoe de luu noe op buienradar mut kieken om te zien dat het buuten prachtig weer is.

Een echten mulder kan zo oe verteln wat het weer giet doen, zo daij op huus an kunt zonder dat ie de pokkel nat kriegt.

Ik zolle zegn kompt is op de molle kieken, ie bunt aijt welkom.

Groeten en totn volgende keare.

Bert de Ruiter