Dat de molle een warm harte toe e draagn wurt deur de luu die an de Balk wont lut zich blieken daw regelmoatig bezoek uut het dorp maagt ontvangen.
Dr bint selufs luu en bedrieven die elk joar en bedrag an geld noar oonzn stiching oaver moakt umme de molle an het dreijen te hoaln.
Doar bunne wie merakels trotse op, en so wies as een hond met zeuven steerten.
Doarumme wulle wie van noe of an de luu wat better op huugte hoaln van watte wie zoal op de molle uutspookt.
An de Balk is wel bekent dat zoaterdags t winkeltie lus is en de molle dreijd en daw smargns de koffie kloar hebt stoan .
Zoaterdagmiddag wurd de haande uut de mouwn u stukken en is de molle an het maalen ,en wurd er an van alles en nog wat geslutteld.
15 joar geleden is de stichting Vrienden molen de Star begonnen met de molle better onder het volk te kriegen, deur van alles en nog wat te organiseren.
Noe mag het vrumt lieken dat iene van de jongste medewerkers het langste op de molle kump.
Die heet Detlef ter Haar en is samen met Jan neijensikkens ,Tinus van Marle , Gerard Vos en Hennie Haasjes uut de ploeg van het eerste uur.
Doarnoa bunt er vulle luu e wes die dr bie gekommen bint ,moar ook noa joaren van hulp zins weegs weer bunt gegoan.
Hellaas bunt ook mensen uut de tied gekommen en poar doar van bunt Rieks Ahuis ,Jan Dekker en Harrie Hulzebosch.
Moar dat is ok de molle van het leaven dr komt luu en zie goat weer, as de molle kon proaten dan haw een kraante zo dik as een telefoonboek.
De mulders die de molle in bedrief hebt e had ,kommen allemoal nog wel te sproake.
Doarumme wille wie dat telefoonboek niet in iene keer in de kraante zetten ,moar pakken wie dr elke keer een blagie uut.
Tegen die tied dat alles in de kraante hef e stoan ,kan ik dialect schrieven en juluu mien krabbels leezn.
Vulle starkte met leezn en ai dr schik van hebt komt is an as de molle dreijd buij ait welkom .
Vuur een vertaling kuij ook bie die maalmoezen terecht.
Groeten en good goan
Namens de stichting en de mulders van Molen de Star.
